તમારું બાળક સ્કૂલવાન કે રીક્ષામાં શાળાએ જાય છે તો ખાસ વાંચો આ કિસ્સો

ન્યૂઝ નેટવર્ક,રાજકોટ: 
સામાન્ય રીતે નોકરી કરતા વાલીઓ સમયના અભાવે પોતાના બાળકોને સ્કૂલરીક્ષા તેમજ વેનમાં શાળાએ મોકલતા હોય છે. એટલું જ નહીં જે-તે વાહનચાલક દ્વારા પોતાનું બાળક હેમખેમ ઘરેથી શાળાએ અને શાળાએથી ઘરે પહોંચવાનો વિશ્વાસ પણ માતા-પિતા રાખતા હોય છે. પરંતુ રાજકોટમાં આવા જ એક રીક્ષાચાલકે પોતાની રીક્ષામાં આવતી અને ધોરણ-8માં અભ્યાસ કરતી 14 વર્ષીય તરૂણી પર ત્રણ-ત્રણવાર બળાત્કાર ગુજારવાની ઘટના સામે આવી છે. હાલ સગીરાની ફરિયાદને આધારે મહિલા પોલીસે રીક્ષા ચાલકને દબોચી લઈને વધુ તપાસ હાથ ધરી છે.

આ અંગે જાણવા મળતી વિગતો મુજબ ધોરણ-8માં અભ્યાસ કરતી 14 વર્ષીય તરૂણીને અગાઉ તેના માતા-પિતા સ્કૂલે મૂકવા જતા હતા. પરંતુ છેલ્લા બે મહિનાથી સમયના અભાવે તેના પિતાએ રીક્ષા બંધાવી આપી હતી. કોઠારીયા સોલવન્ટ વિસ્તારમાં રહેતો 42 વર્ષીય રિક્ષાચાલક અશોક નરસીભાઇ ચૌહાણની રીક્ષામાં તે દરરોજ શાળાએ જતી હતી. આ તરૂણી સાથે તેની બહેન સહિતની અન્ય છોકરીઓ પણ શાળાએ જતી હતી. દોઢેક મહિના પહેલા અશોક તેઓને શાળાએ મૂકવા ગયો હતો. ત્યારે તરૂણીની બહેન ઝડપથી ઉતરીને જતી રહી હતી. પરંતુ અશોકે તરૂણીનો હાથ પકડી લઇ તારું કામ છે તેમ કહી રીક્ષામાં બેસાડી રાખી હતી.


 બાદમાં શહેરની ટી.બી. હોસ્પિટલ પાસે લઇ જઇ ત્યાં જ સાડા અગિયાર સુધી રોકી રાખી હતી. અને શાળા છૂટવાનો સમય થતાં ફરીથી સ્કૂલે લાવ્યો હતો. અને કોઇને વાત કરી તો સારું નહિ થાય તેવી ધમકી પણ આપી હતી. એકાદ મહિના પહેલા સવારના સાડા છ વાગ્યે ફરી અશોકની દાનત બગડી હતી. અને તરૂણીની બહેન સહિતની બીજી છોકરીઓને શાળાએ ઉતારી તરૂણીને ગુલાબનગર મફતીયાપરાના કોઇ મકાનમાં લઇ ગયો હતો. જ્યાં અડપલા કર્યા બાદ શરીર સંબંધ બાંધ્યો હતો. આ પછી સાતેક દિવસ પછી ફરીથી લઇ ગયો હતો. આ રીતે ત્રણેક વખત લઇ જઇ બળાત્કાર ગુજાર્યો હતો.


 છેલ્લે બે દિવસ પહેલા ફરીથી અશોક તરૂણીને ગુલાબનગરમાં લઇ ગયો હતો. દરમિયાન અચાનક તરૂણીના પિતા કોઈ કારણોસર શાળાએ પહોંચ્યા હતા. જ્યાં શિક્ષકે હું પરમ દિવસે શાળાએ નહોતી આવી તેમ કહેતાં પિતાએ પુત્રીની પુછપરછ કરતાં તરૂણીએ અશોકે જે કંઇ કર્યુ તેની વાત જણાવી હતી. જેને લઈને તરૂણીના પિતા મહિલા પોલીસ પાસે પહોંચ્યા હતા. અને સઘળી વિતક જણાવી રીક્ષાચાલક અશોક વિરૂધ્ધ ફરિયાદ નોંધાવી હતી. આ ફરિયાદને આધારે મહિલા પોલીસે રીક્ષાચાલક અશોકની ધરપકડ કરી છે. તેને સંતાનમાં સોળ વર્ષની એક દીકરી અને તેનાથી નાનો એક દિકરો છે. આ હવસખોરે પોતાની દીકરીથી પણ નાની ઉમરની બાળા સાથે ચાર-ચાર વખત હવસનો શિકાર બનાવતાં તેના પર ફિટકાર વરસી રહ્યો છે.
● આ પ્રકારના વધુ સમાચાર માટે 👉અહીં ક્લિક કરો